Celebración do Perdón: 10 de marzo de 2012

Celebración do perdón e da reconciliación



1.- Primeiro momento: AO ABEIRO DE DEUS

CANTO:

Onda ti, noso Pai, á tardiña,

onda ti, que nos levas da man,

axuntámonos pra agradecerche

a ledicia do día que cae.

Como axunta a galiña os pitiños,

cando á tarde se vai indo o sol;

ao calor das túas ás quentiños,

na túa paz nos acolles, Señor.

Lectura de Lc 15,1-2

Comentario

Lectura de novo de Lc 15,1-2

Silencio

Oración en común

Xesús, meu Xesús,

meu mestre e señor,

meu irmán e compañeiro.

Grazas por podermos estas aquí,

véndonos, falándonos, sentíndonos.

Cantas cousas me evoca

a túa presenza!

Repleto de Deus

por todos os recantos do teu ser,

as túas palabras e accións

eran sempre

palabras e accións de comprensión,

de abundancia de misericordia,

de urxencia por reparar vidas,

de condolencia a fondo

por quen sufría na vida,

de protesta ante quen tal provocaba,

de decisión para o cambio necesario.

Xesús,

brazos que abrazan,

vida que se contaxia,

calor que derrete inercias e pasividades,

auga que limpa e que renova,

alegría envolve e que namora.

Xesús, meu Xesús,

cos publicanos e pecadores

que se achegaban a ti para escoitarte,

estou eu,

estamos nós,

precisados tamén de ser recibidos por ti,

de liberarnos co perdón do teu Deus,

de comer na túa mesa comunitaria,

para sermos simplemente

homes e mulleres novas,

para unha terra nova no teu nome.

2.- Segundo momento: RECOÑECENDO O NOSO PECADO

CANTO:

Son pecador, quero arrepentirme,

son pecador, quero arrepentirme,

son pecador, quero arrepentirme,

espero en ti, Señor.

Lectura de Lc 15, 11-19

(lectura representada de forma simple: narrador, fillo, pai)

Comentario

Suxestións para o arrepentimento

Canto de novo

Silencio. Xesto penitencial:

-Hai un crucifixo.

-Hai un recipiente con auga,

-Unha fardela onde botar o pecado.

-Un papel en branco, onde escribir nomes

de persoas coas que un se sinta en débeda.

-Dirixirse a algunha persoa presente.

-Saír, sen máis, recoñecéndose pecador.

-A pedra branca da mañá.

A cada recoñecemento de pecado,

todos contestamos dicindo:

DEUS PAI/NAI NON QUERE

QUE TE PERDAS.

OS TEUS PECADOS ESTÁN PERDOADOS.

ALÉGRATE E VAITE EN PAZ.

3.- Terceiro momento: FAGAMOS GRANDE FESTA

Evocación de imaxes bíblicas de Deus:

Coma unha osa que defende os seus osiños,

así é Deus connosco

Coma unha pita que cobre os seus pitiños,

así é Deus connosco.

Coma un pai ou unha nai

sente tenrura polos seus fillos/as,

sente Deus tenrura por nós.

Aínda que unha nai esquecera os seus fillos,

eu –Deus— non o faría.

Coma un pastor que busca a perdida

e a trae ao lombo recuperada

e fai festa por iso,

así é Deus connosco.

Coma unha muller que convoca a veciñanza

para unha festa pola moeda perdida e atopada,

así é Deus connosco.

Coma un pastor,

que dá a súa vida polas ovellas,

así é Deus connosco.

Lectura de Lc 15, 22-24

(tamén representada: narrador, fillo pecador, pai, criados.)

Música de festa, canto, palmas.

Lectura de Lc 15,25-32

(tamén representada: narrador, fillo maior,  criado, pai).

Música de festa, canto, palmas.

CANTO:

Déixate querer, déixate querer,

déixate querer por Deus.

Non poñas trabas ao teu amigo,

non teñas medo a compartir

as inquedanza dunha amizade

que ten por froito feliz vivir. (2)

Pregaria

NO NOME DE DEUS PAI/NAI

FAGAMOS GRANDE FESTA.

Vistamos os mellores vestidos

dos mellores días de festa,

as roupas da alegría,

as roupas da irmandade,

que cura e que libera.

Adobiemos os dedos co anelo máis prezado,

o que nos vincula á vida,

e crea entre nós recios vencellos

de fidelidade dada e recibida.

Poñamos nos pés zapatos axeitados

para a brincadela, para o baile,

para andar camiños de solidariedade

e inventar o novo a cada hora.

Fartémonos de alimentos saborosos,

comamos e bebamos ledamente

facendo mesa común

coa xente máis afectada pola crise,

collamos forzas para o camiño,

que é longo, duro e imprevisto.

Fagamos festa, irmáns,

fagamos festa, irmás,

porque estabamos mortos/as

e Deus Pai/Nai volveunos á vida,

estabamos perdidos/as,

e fomos por Deus atopadas/os.

Fagamos festa, irmáns,

fagamos festa, irmás,

no nome de Deus Pai,

fagamos grande festa.

CANTO

Deixate querer ...

Obsequio de festa.